حفلة للست...... لايف

سمسم: ما نفسيكيش تروحي حفلة للست؟ .. احنا بقالنا كتير ما روحناش
سمسمة: يا ريت يا حبيبي دي فكرة هايلة خالص
سمسم: خلاص يا عزيزتي اجهزي وانا هعدي عليكي بكرة بالعربية الروزوليس ونروح على طول
سمسمة: لا لا خليها الفوليكس السودا عشان اوسع وانا الفستان بتاعي حيكون منفوش ومش عايزاة يتكسر
سمسم: تمام تمام، بس ابقي قولي للباشا اننا احتمال نتأخر شوية عشان عايز أتعشى معاكي في سيميراميس
سمسمة: خلاص حقوله، هتأكلني ايه بقى؟
سمسم: سمعت انهم جابوا أكلة جديدة من إيطاليا اسمها مكرونة عايزين نجربها
سمسمة: خلاص اتفقنا، بس ابقى البس البدلة السموكين بكرة وانت جاي
سمسم: اه طبعاً دي حفلة رسمية، تفتكري مولانا حيكون هناك بكرة؟
سمسمة: ده أمر مؤكد.... الباشا جاتله أخبار موثوق فيها من السرايا إنه هيحضر الحفلة بكرة
سمسم: عارفة لو ده حصل... ليكي عندي عقد ألماظ لسة جايلي من باريس
أصل جلالته كان قايل انه هينعم عليا بالوزارة وفرصه أفكره بكرة
سمسمة: رائع رائع
أقولك خبر بألف جنيه يا شوكت(اللي هو سمسم )
سمسم: قولي يا جلنار(اللي هي سمسمة)
سمسمة: فاكر صافيناز هانم مرات طلعت باشا السرياقوسي اللي قابلناها في نادي السيارات؟
سمسم: اه اه دي اللي تبقى بنت حشمت باشا الخازندار
مالها يا عزيزتي؟
سمسمة: أخوها بقى يا سيدي مولانا أنعم عليه بالباكوية من كام يوم بس المسألة لسه سر محدش يعرفها... بس صديقتي الأميرة درية قالتلي
سمسم: دي حاجة عظيمة خالص
خلاص يبقى نعزمهم بالمناسبة ديه في عزبتنا في المنصورية
سمسمة: ممتاز .. بس وحياتك يا شوكت تجيب صحابنا الطلينة لحسن محتاجة أتدرب ع التشا تشا تشا وهما اللي بيعلموني
سمسم:احنا مش قولنا بلاش الأفعال الصبيانية دي
في واحدة جوزها على وش وزارة وترقص تشا تشا تشا
انتي عايزة القصر يقول عليا ايه؟
سمسمة: وماله يا شوكت.. متبقاش معقد كدة
كل الأميرات بيرقصوا
دي حتى والدة مولانا بترقص
سمسم: والدة مولانا تعمل اللي هي عايزاه
دي أبوها كان ناظر محافظة
مش باشا!
سمسم: وبعدين انتي ناسية انتي عملتي إيه لما انا رقصت مع ملك هانم يزبك ف الحفلة اللي كانت معمولة على شرف المندوب السامي الجديد انتي فضلتي مقاطعاني اسبوع
سمسمة:صحيح.. بس دي كانت هتاكلك بعنيها
وبعدين ملك دي سمعتها مسمعة ف كل السرايات والقصور الشريفة
سمسم: ع العموم ده موضوع وخلص
سمسمة: ها هاتعزمهم بقى يا شوكت يا حبيبي؟
سمسم: لا لا ... ومش عايز كلام تاني ف الموضوع ده
يا إما هيكون ليا تصرف تاني مع الباشا والدك
سمسمة: بقى كدة..... بتهددني!
سمسم: اعتبريها زي ما تعتبريها أنا مش فاضي للكلام ده... البلد مقلوبة
وفي شوية ظباط رعاع مسمين نفسهم الظباط الأحرار وقال إيه عايزين يقلبوا نظام الحكم
أوباش!!!!!!!
سمسمة: واااا مصيبتاه
بس اكيد مولانا هيتخذ الإجراءات اللازمة للقضاء على العناصر الفاسدة والخاينة دي
سمسم: أنا سمعت إن حيدر باشا وزير الحربية ناوي ينضف الجيش منهم خالص
سمسمة: كدة احسن بلاش وجع دماغ ع الفاضي
دول أكيد شوية شباب مندفع و احمق ومش مدرك عواقب أفعاله... دول يستاهلوا القتل
سمسم: أكيد عزيزتي
قوليلي إنجي بنتنا عامله إيه؟
سمسمة: مغلبة الدادة معاها .. شقية اوي..وميش بتذاكر دروس البيانو بتاعتها ومدام
فيفين بتشتكي منها خالص
سمسم: لا ده مش شئ جيد خالص
أنا عايزها تبقى هانم أرستقراطية عشان اجوزها واحد من الأمراء
سمسمة: انجي طول عمرها بتتربى تربية أميرات.. بس البنت بحس ساعات انها بتتمرد على التربية دي
سمسم: طب اندهيهالي من الجنينة
( تدخل إنجي اللي هي سمسمة برضه)
انجي: أفندم يا والدي العزيز
سمسم: والدتك بتقول انك مش بتسمعي الكلام ومش بتذاكري دروس البيانو.. ده صحيح؟
إنجي: ايوه صحيح!
سمسم: أه... وليه كده يا عزيزتي انا مش قولت لازم نسمع كلام ماما
ولا تحبي استعمل معاكي اسلوب غير لائق.... انت عارفة بابا لما يقلب ع الوش التاني
مفيش غير الكرباج!!!!
سمسمة: ( مش واسعة شوية دي)
سمسم: ( عديها محدش واخد بالوا)
إنجي: ليه بس يا بابا .. انا مش بحب البيانو انا عايزة اتعلم عود
سمسم: عود إيه ومسخرة ايه انتي عايزة تبقي زي الفلاحين اللي شغالين عندنا
إنجي : مالهم الفلاحين .. هما مش بني آدمين زينا
وبعدين انا مش عايزة أكون الاميرة انجي .. أنا عايزة اكون إنجي و بس
سمسم: إخرسي ( يضربها بالقلم)
على آخر الزمن بنت شوكت باشاتبقى زي الفلاحين والرعاع دول انتي عايزاهم يقولوا عليا إيه؟
شيوعي!!!!
سمسمة: ما خلاص بقى يا شوكت متعصبش نفسك .. روق دمك
دي بنت مش عارفة فين مصلحتها.... أجيبلك كوباية لمون؟
سمسم: لا لا الدكتور مانعني من اي حاجة فيها سكر.. مانتي عارفة
يالا قومي نامي انتي و انا حشوف حساب العزبة اللي بعته عبد الواحد افندي النهاردة و أحصلك
سمسمة: طيب خلاص ما تضايقش نفسك انت بس
تصبح على خير
سمسم: وانتي من اهل الخير يا عزيزتي

***************************